من وطن الجدود سلام بلا حدود

الاخوه و الاخوات اعضاء و رواد المنتدى
السلام عليكم ورحمة الله تصمو و تفطرو على خير
اليومين ديل توجد ظاهره هى حلال لكن مشكله و نفس الوقت حل مشكله الا وهى ظاهرة الطلاق عند الشباب حديثى الزواج هل نتاج لعدم المسؤليه انا لا اظن طالما الشاب اقدم على الزواج اكيد قدر المسؤليه الاخوات معليش انا بطبيعة حالتى دايما فى جانب الرجل لحاجات كتيره منها سعيها وراء العيش نحن اثنين انا ووالدتنا الدكتوره فاطمه اختلفنا اختلاف مظهرى و جوهرى هى قالت العلا فى الشباب شباب غير مسؤؤل يتزوج اليوم يطلق بكره انا قلت طالما هو اجتهد و جمع مال الزواج اصبح نبراس المسؤؤليه لانه تزوج من كد ماله و السبب من البنات و تناقشنا نقاش بلغ حد الشد و الجزب و الاخوه الشباب انا ما زلت و ساظل ادافع عنكم بشده بس انتو يلا بكل صراحه فضفضو و ملكونا اسباب الطلاق منكم اما منهن

الاخ
احمد الشريف
كلامك سمح و طيب لكن الرجل ما عنده حق شرعى
الرجال قوامون على النساء
وجمع المال من اجل العفاء و العفاء فى الزواج و الزواج من سنة النبى صلى الله عليه و سلم ما حاجه ساهله فى مره من المرات مشينا نحن مشكلة واحد زميلنا مع زوجته و هما الان فى العام الاول للزواج الراجل قام قال المره دى متل باعوضة الخريف تنقنق الليل كلو زميلنا المعانا واقع فى نفس المشكل لكن متحمل قال له يا خى باعوضة الخريف دى موسميه فى مره تنقنق السنه كلها
انا ماداير اظلم المره لكن مشكلتى ما بعرف اقيف فى الحياد دايما فى صف الرجل يعنى انصره ظالما او مظلوم لو ظالم بقدم له بعض النصائح لكن ما بحمل عليه وفى زوجات على الطلاق مثال للزوجيه عندهن قوة تحمل ما عاديه و خصوصا لمن الرجل يكون ردى يتحملن و كلمة ردى دى عندى فيها كلام كتير نخليهو وراء
تخيل يا ود الشريف زول خسر القدامو و الوراه فى الزواج فجاءه يدخل الجرجره و يصل الى طريق مسدود و ينفصل مش مصيبه انفصل و هو مكره حاول المستحيل عشان يواصل وما قدر المهم انشاءالله لقدام نواصل و ياريت كل الاخوه و الاخوات الاعضاء كل زول يدلو بدلوه فى الموضوع دا بكل حكم لانه فى ناس عندهم الحكمه و اصحاب تجارب ينصحو الزوجه تتحمل و الزوج كمان يكون صبور و الايام كفيله تحل المشاكل قالو يطول الزمن و يترخرخ المكروب

الأخ عاصم أبابيل كل سنة وإنت بألف خير وكل الأهل بألف خير والقابلة على أمانيكم (وعيد سعيد).
لك التحية ومشكور على الطرح لهذا الموضوع الإجتماعى والسبب الرئيسى فى تفكك العلاقات الأسرية فى المجتمع الواحد.
أعتقد أخوى عاصم إنو الأسباب التى تودى إلى الطلاق ترجع إلى عدة أمور منها الوعى والتعليم وإدراك إمور الحياة والوعى الدينى هو الأساس فى بسط المودة فى العلاقة الأسرية والإستقرار لها وللمجتمع قاطبة .
ثانى شىء وهو الأهم هو التفاهم بين شريكى عش الزوجية وعدم السماح لأى عزول بالتدخل فى حياتهم ومشاكلهم مهما كانت صلة القرابة .
حل المشاكل التى تحدث بينهم وعدم تضخيم الموضوع ،ولابد من التنازلات من أحد الطرفين لرأب الصدع حتى تبحر المركب فى أمان .
عدم سماع الكلام الذى يبنى على غير حقائق حتى نتحرى الحقيقة كاملة .فالمجتمع البسيط الغير متعلم هو ما يتعرض لمثل هذه المشاكل الإجتماعية التى غالباً ما تؤدى إلى كارثة إجتماعية .
فالإثنان الرجل والمراءة هما المسؤلان كلٌ حسب تركيبته وعقليته وتعليمه ومحيط أسرته .

الاخ
التوم
جزاك الله خير و كل سنه انت و الاهل و الاحباب الغريبو البعيد طيبين و عيدا مبارك عليكم حقيقه كلامك سمح و تكلمت فى مربط الفرس الوعى الدينى اهم شى
قال النبى صلى الله عليه وسلم لو امرت احد ان يسجد لاحد لامرت الزوجه ان تسجد لزوجها و ايضا قال الزوجه ان اغضبت زوجها فى الليل الملائكه تلعنها الى طلوع الفجر و النبى صلى الله عليه و سلم ركز على الليل لان الليل فيه الهدو و السكينه و الراحه و الاستجمام و اللباس
عشان كدا اخى التوم نتمى كل الشباب يكون بفهمك للحياه الزوجيه و رب الكعبه نعم الفهم بالاخص فى عدم السماح للاطراف الاخرى بالتدخل مثل اخوات الزوجه و صديقاتها لانهن دايما يسبحن عكس التيار و يقولن للزوجه ما تتنازلى و تنازل الزوجه مهم

نتفق معك أن هذا من المواضيع التى تستحق النقاش
ونتفق مع الأخوين أحمد والتوم أن الوعى والتوافق بين الزوجين هو أس المشكلة .
ونزيد أن عدم الأعتراف بأن هنالك مشكلة وبالتالى عدم مناقشتها بين الزوجين أولا وأولياء الأمور ثانيا . .حتى مرحلة حكم من أهله وحكم من أهلها . . هو ما يعجل بأن أى مشكلة تواجه زوجين حديثين . . ليس لها من حل الأ . .( خوة فرتق ) . .
الأخ التوم نشيد بتناولك العميق للموضوع . . وأرشحك للدخول مع الأجاويد فى هكذا مشاكل . . . وأعتذر لك بشدة وعن كل أعضاء المنتدى لتأخرنا فى التعزية فى الوالدة العزيزة الحاجة زينب عمر الحاج حمد والتعزية موصولة لكل آل الأمام وآل حاج حمد.