نبارك ليك

المساهمات : 114 تاريخ التسجيل : 28/01/2008

التكينة ..رمضان يتباخت عليك
وربنا يتقبل الصيام
دايما قدامية
أريتك حلت السرور
وربنا يعدلها عليك محل ماتقبلي
حليل رمضان فى البلد البرش المفروش والحوش المرشوش
حليل اللمة والمويات
والناس متلمة بالعشرات
حرم كان تضوق دي
وشيل من ديك
وقبل مايتبل الريق
تقيف ريقان
المغرب يالحبان
ومحمود طرف مرق الحقة
واتكوم وقذ الكوع
وحكوة
وتمرة
وبليلة قسيل
وكمان فنجان
للملح الحار

يابلدا
بقالي سرابا بعيد بالحيل
ولافي النوم بجيني منام
ومن الفوقي
يبل شوقي
أقعد أصاوط الكيبورد
افش المغسة في الأنترنت
ياربي
أنا في الدنيا دي شن سويت

جدع جبادتي في البحر الميت
وقلت أرزق
يالشيخ إدريس
يا إتعشى البيت
يااتقطع الخيت
طلع لي كديس

ارفعو ايديكم
لاعن حد السما وأزيد
و قولوا معاي
يعود رمضان
بشارة خير
وفال وأمان
وتبقى أبعد فجة
نساقر ليها أم درمان
والمطار يلغوهو
ومكانو يبنوهو بس ديوان
ويزرعوا ساحتو برتكان و نخيل
وفي المدخل
يرصو أزيار
يسوو سبيل
وسودان آير
يشيلا الطير
ويابا يرك

وام بقي للحج
نحج بالعوم
وغريقنا شهيد

أمانة عليكم تمدو الليد

آمين يارب العالمين

شهركم مبارك

المساهمات : 33 تاريخ التسجيل : 06/01/2008

والله ايوسف اخوى هسه ماعارف ارد عليك اقول شنو ؟ ؟؟..

اخير اسكت

موضوع: رد: نبارك ليك الإثنين سبتمبر 01, 2008 2:02 pm

أتبارك عليكم الشهر الفضيل يا أهلنا بالتكينة وكلامك يا التوم حلو بالحيل لانه أزاح الغبار عن أيام نسأل الله أن يعيد سيرتها الاولى وحليل التكينة والصوم فيها وطرف الضل ولمة الناس وحليل دكان المرحوم أبرم ربنا يتقبله ويرحمه وجلسة العصرية والناس تشتري في اللبن واغراض الفطرة وحليل مكان الشربة وناس الفريق وحليل س.....ة المغربية في دكان المرحوم أبرم وبعدها صلاة التراويح في خلوة فكي عباس ربنا يتقبله ويرحمه وبعدها مراسم العشاء والخلطات وبعدها اجمل مافي رمضان دقة المسحراتي الله يالها من أيام ولحظات محفورة بعمق في ركن عميق بالقلب لا يغشاها النسيان وحليل صيحات شفع التكينة بعد الافطار مباشرة تسمعها من كل الجهات رمضان جانا الكرشه ملانا ابري
ربنا يحفظك يابلدنا الغالية ويحفظ أهلك الطيبين ويرجعنا ليك سالمين غانمين ويحفظك طيورك المهاجرة وكل الاحبة فلذات التكينة
تخريمة : تحية خاصة لشلة المعلمين عباس محمد علي والطيب مصطفى وخالد عبدالوهاب وخالد بابكر ومحمد بابكر مغربي واللود والضامنه وعصام زلط وعبود الصاوي وحسين الصديق وشرف ابراهيم ومحمد بيتر وكل الاحبة بدكة دكان عمر ود ابراهيم
وسلام خاص للمحامي عبدالحليم والطيب عافية وحاتم ابراهيم وحافظ ابراهيم وحازم ابراهيم ووهب الله منصور والحسين الماحي

موضوع: رد: نبارك ليك الإثنين سبتمبر 01, 2008 5:06 pm

]الاخ / التوم
رايع رايع رايع بكل ماتحمل الكلمه من معانى فقد لامست كلماتك جرح قد خلناه اندمل ولكن انى يكون ذلك فلا زالت جوانحنا تلهج بالحنين الى تلك الايام والى حقب لانعرف ان كانت ساعات الزمن سوف ترجعها لنا .
ولك الشكر ياانسان بطعم ناس الحله الطييبين وبرائحه الزمن الوردى وانشاء الله سودانير يشيلا الطير وتعيش انت فتهدينا الروعه اين ما حللت ولك الود[/size]]

المساهمات : 318 تاريخ التسجيل : 24/01/2008

التوم كلامك خاطى اللوم مليانه محنه و طيبه متل طيبة ابواتك و رمضان كريم و يا ريت فى العيد تامين و لامين و معتوقين وانت تكون وسطنا وسط اهلك و كلامك السمح دا نسمعه من فاهك

حليل اللمة والمويات
والناس متلمة بالعشرات
حرم كان تضوق دي
وشيل من ديك
وقبل مايتبل الريق
تقيف ريقان
المغرب يالحبان
....................................
ما اروع العودة لتلك الايام النواضر التى جسدها المبدع التوم بحس مرهف و احساس حقيقى داعب الدواخل و ايقظ كامن الشوق لعادات جميلة ما زالت تتجسد فى قريتنا الحبيبة .
شكرا التوم و هنيئا لك امتلاكك ناصية الابداع و العذوبة.