ظرفاء التكينه وطرائفهم

من ظرفاء التكينة محمد بابكر ود السعديه والد عبده مولى و قسم السيد اخوه مره قاعدين فى الشوبلى عندهم بضاعه يبيعو فيها و عندهم سبعه قروش قدامهم و و راهم جاءهم واحد شحات لابس مقطع قسم السيد ابا يديهو امحمد اخوه قال ليهو يمكن يكون نبى الله الخضر اديهو السبع قروش بتعوض سبعه جنيه و قسم السيد اداهو القدامو و وراهو و نتظرين العوض جو ماشين بى بيت الشراب الاندايه الله يكرمكم و يكرمنا لقو زولهم خاطى جردل كبير و يشرب قسم السيد قالو امحمد اخوى عاين خضرك

معروف انه شغال في السوق وفي يوم من الايام في السوق جاء واحد من الرشايده
يريد ان يبيع غنمايه ولما باعها طلب الزول الشاري من ودراشد ضامن
فذهب ود راشد لحاج كسره وقال له اضمني ؟ فرد حاج كسره ان ساسك
خمسه امتار في الواطه ما بضمنك خلي شبعك البتقلعن في ساعة

طرايف اهلنا الحلوين ماليها حد واقول ليكم واحده لعمر عباس :-
حاجه كبيره متلحه عمر عباس كل يومين تلاته جايه تفحص السكرى وبعد الفحص تدى عمر عباس دعوتين وتتخارج عامله نايمه بقروش الفحص ، يوم عمر قال يسوى فيها مقلب قام قال ليها السكر زايد قالت ليهو شنو الباكلو وشنو الما باكلو قل ليها اكلى اى حاجه الا حق الفحص .

الخليفه/ قسم السيد
ابنه الشاعر عوض الله رسل له بطانيه من جده فى عز الصيف و هو كان
مفلس قال لى الزول المرسله معه اداك معاها قروش قال له لا
قال له الله يدينا ليها برد

الشكر لاى زول ساهم فى الموضوع وزى ماقلت ليكم دايرين الناس كلها تشارك عشان نسوى شويه فرفشه واديكم واحده لى حاج كسره :-
الناس زمان كانت بتحب تربايه الجداد وحاج كسره امو مانعاهو يجيب ليهو جداده
يوم قال ماشى البحر امو قالت ليهو ما تمشى البحر زايد بتغرق
قال ليها وما اغرق فايتا تكاكى

[الاخ الحبيب ود القمر سلام مربع
اولا الظرافة وسرعة البديهه شي عادي عند اهلنا البش بالتكينة واظنك لم تكتب الا القليل منهم ونششكرك لانك رجعتنا لشخصيات محبوبة وبعدين مجرد سوال لماذا لم تبدا كتابة الاسماء بالصاوي رحمه الله
نسال الله ان يمد في اعمار الحيين منهم وان يرحم الاموات جميعا

الاخ
محمد قمر
اضف الى هذه الكوكبه
الراحل المقيم
مامون حمد النيل و والده جدنا حمد النيل عندهم شدة قفشات
هاك دى من ميمى
قال لعبده مولى ورح المقاريت نشترى الحمام و الجداد
بعد ما وصلو المقاريت دخلو اول بيت لقو ناس البيت مافى المامون قال لى مولى
خش جوا ناولنى الفروخ الفى الصفايح كلهن
لفه بهناك مش قال لست البيت الحرامى داير يسرق حمامكم و جرا نزل البحر
المره ضربت الكوراك و الجماعه جوا خلو عبده مولى بين الميته و الحياءه
ومامون وقع البحر عام مرق بجرف محمد على عبد الرحيم طبعا ناس
المقاريت ما بعرفو يعومو
اللهم اغفر و ارحم و طيب ثراء المامون اللهم ابدله اهلا خيرا من اهله و دارا خيرا من
داره برحمتك يا ارحم الرحمين
اللهم صلى و سلم على سيدنا و حبيبنا و جدنا النبي الامى الطاهر العفيف
محمد بن عبدالله صلاة بعدد الحص و الرمال