التعليم في السودان

حبيت انو يكون اول موضوع اكتب عنو لانو بعني لي الكثير ويمكن لناس كتيرة خاصة المقيمين خارج السودان
انا عن نفسي شايفة انو مستوى التعليم في السودان اقل من مستوى التعليم لدول كتيرة ممكن نذكر دولة الامارات مثال على مستوى تعليم عالي جدا من حيث التنسيق والتطبيق وبالمناسبة المدارس الحكومية هي الافضل فيها اما السودان فالناس بتفضل المدارس الخاصة اكتر لانها اكتر اهتمام مع انو نادر ما بتواجد فيها عامل التطبيق ايضا وخاصة انو امتحانا الشهادة الثانوية اغلبها بتعتمد على الاستنتاج مع انو ما بقرنوه مع تدريسم وبظن انو دا السبب فتدني النتايج فقليل البجبوا فوق 95 بعكس الشهادة العربية فمستوى التدريس مماثل لمستوى الامتحانات ودا برضو السبب البخليهم يجيبوا احياناً 100%
والحاجة اللي انا ما عارفة ليها سبب هو تعديل الشهادة العربية في السودان مع انوبعضها بعتبر احسن من الشهادة السودانية نفسها
ممكن ايضا نتطرق لتعليم اللغة الانجليزية فالسودان ففالمدارس الحكومية ببدؤوا بتعليموا فالصف الخامس والدول الاخرى بتهتم اكتر بتعليموا في مرحلة مبكرة اكتر
طبعا دا كله كان رأي فحابة اعرف آراءكم.............

بشكرك على هذا الرد الجميل وبشكرك على دعم رأي ولو كان في بعض النقاط
وبتمنى مشاركة الاخرين والاسهاب بآرائهم في هذا الموضوع

الموضوع مهم جدا ومشكورين علي تطرقكم لبعض المواضيع الحيوية

سعيدة لهذه المشاركات الجميلة وهذا النقاش الجدي لكن ياريت يسمعوا ويشوفوا
ويعيدوا النظر عشان يرجعوا لينا البلد المتحضر المكافح الصاعد دائما نحو التطور والتغير للاحسن انشاء الله
ودائماً فخورين بيك يا سودانا

الأخت سيسبانة لك التحية
أود أن أخبرك من موقع المعايش للموضوع الذي تطرقت إليه فأنا عملت معلما في السودان في المرحلة الثانوية والأن أنا أعمل معلما في الأمارات الدولة التي ضربت بها المثال في موضوعك واسوق اليك فقط ثلاث فروقات بين هنا وهناك
( 1 ) الصرف
هل تعلمي أختي أن ميزانية مدرسة واحدة هنا في الأمارات يمكن أن تعادل ميزانية وزارة تربية ولائية بأكملها في السودان .. لا أبالغ في ذلك أنا كنت مدرس في السودان وكنا نشتري الطباشير من رواتبنا وكنا نطرد الطلاب من الحصص لمجرد أنهم لم يدفعوا قروش الشهر والتي تسير بها ميزانية المدرسة وجزء من رواتب المدرسين
هذا ناهيك عن البيئة المدرسية وتجهيزات المختبرات والصفوف والمكتبات ووووو غيره
( 2 ) الجانب التنظيمي
أعني الكادر الوظيفي ففي السودان عادي ممكن تلاقي مدرسين يدرسون في مدارس البنات والعكس مدرسات في مدارس البنين .. أما هنا فلا يحث هذا الشي وهذا شي كبير في علم التربية وله مردود في التحصيل
(3 ) الجانب الإداري
الأدارات في السودان لاتتابع ميدانيا الإ نادرا أما هنا كل يومين هناك زيارة للمدرسة من مجموعة من الأدرايين مكن المنطقة التعليمية يقفون على كل صغيرة وكبيرة ويرفعون تقاريرهم أولا بأول

بس فرق مهم جداً جداً جداً وهو نوعية الطالب فالطالب عندنا في السودان مع الظروف الكحيانة دي فهو طالب مجتهد ومجد وعنده دافعية عالية للتعلم بالعكس من الطالب الخليجي فهو مستهتر ولا هم له سوى الموبايلات والسيارات ومتابعة الفضائيات والجلوس أمام الإنترنت .. وياليته لو كان في شيء مفيد

عموما الموضوع كبير ولايمكن حصره في مقال وقد يصلح هذا الموضوع كرسالة ماجستير

شكراُ ليك اخي ابراهيم
لكن لو لاحظت انا لم اتطرق لموضوع الطلاب هنا وهنا والفروق بيناتهم في التحصيل الدراسي
لانو دي حاجة معروفة انا ما ممكن اني اخالفها انو الطالب السوداني ذكي بالفطرة ومحب للتعلم بس عاوز اهتمام ودي المشكلة اللي انا محدداها اما طبعاً معظم طلاب الخليج عكسهم تماماً فهم ما عندهم العلم المرتبة الاولى في الحياة مع انهم بمتلكوا جميع السبل البتخليهم عباقرة
اما عن تكاليف الدراسة هنا وهناك فانا بختلف في الرأي عنك كليا
في السودان لو انت عايز تحقق مستوى احسن في التحصيل عليك بالمدارس الخاصة اللي رسومها شوية وشويات وغير طلباتهم اثناء العام الدراسي مع انهم ماعندهم حاجة اسمها ترحيل ولو عندهم فلازم تدفع
اما هنا المدارس الحكومية ماعندها اي رسوم الكتب مجان اي شي مجان حتى الترحيل حاجة ضرورية عندهم وبرضو مجان
وللموضوع بقية

برضو انا ماخالفتك يا اخ المعز
لكن ما اظنك فهمت هدفي من الموضوع انا بتكلم عن التعليم في السودان واساليبه والمدارس فيه وكيفية تدريسها وذكرت بعض المقارنات لكن بس في اساليب التعليم ما قارنت بين الطلاب نفسهم
وكنت عايزة نناقس حلول المستوى التعليمي المتدهور في دا لو في حلول......

بسم الله الرحمن الرحيم

الاخوة رواد واعضاء منتدى التكينة السلام عليكم ورحمة الله تعالى وبركاته .
الشكر لكاتبة الموضوع ( التعليم فى السودان ) والردود الجميلة والمفيدة من الاخوة .
اما بخصوص التعليم فى السودان فالموضوع متشابك ولا يمكن اخذه بمفرده لارتباطه بجوانب اخرى ، اقتصادية وسياسية وغير ذلك ، فلا يوجد اصلا وجه مقارنة بين الامارات العربية المتحدة او اى دولة من دول الخليج والسودان للاتى :-
1/ السودان دولة افريقية ( عربية ) زراعية نامية بينما دول الخليج بترولية غنية 0
2/ السودان دولة غير مستقرة سياسيا بينما دول الخليج مستقرة تماما .
3/ السودان خاض اطول حرب استنزافية فى العالم فى العصر الحديث – 50 عام 0
4/ القرارات الارتجالية والمسيسة احيانا – ثورة التعليم العالى – فلا توجد بنية تحتية لهذا التوسع الكبير ، كما ان تغيير المناهج كان بدون دراسة عميقة ودورات تأ هيلية للمعلمين .
5/ هل تعلمى ان فى معظم دول الخليج ميزانية التعليم مفتوحة ويرجع فى نهاية العام الدراسى فائض الميزانية للمركز ( بينما ناس ابراهيم الامين ارباب يشترون الطباشير من رواتبهم ) .
6/ كثير من الكفاءات هاجرت او تركت ميدان التعليم نسبة لتدنى الاجور .
رغم كل الاسباب المذكورة الطالب فى الخليج ليس بافضل اكاديميا من الطالب فى السودان والنتائج الجامعية توضح ذلك .
واخيرا نسال الله العلى القدير ان يعم السلام السودان وينصلح حال التعليم وبقية الامور قولواااااااااااا امييييييييييين .
والسلام ختام

بشكر الجميع على هذه الاراء