الرئيسيةاليوميةمكتبة الصوربحـثس .و .جالتسجيلالأعضاءالمجموعاتدخول

شاطر | 
 

 بهديكم يارواد المنتدى هذه الروائع من أغاني الحقيبة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
فتح الرحمن بابكر السيد

avatar

المساهمات : 98
تاريخ التسجيل : 05/08/2008
العمر : 46

مُساهمةموضوع: بهديكم يارواد المنتدى هذه الروائع من أغاني الحقيبة   الأربعاء أغسطس 13, 2008 10:47 am

هواك هواى

هواك وهواى بى جاروا وسبن أفكارى نظراتك

أحب تعطف تزيل وجدى واحب كل البحب ذاتك

بحب لونك بحب لونك بحب يا حبى نفحاتك

بحب فى خدك الزهرة وبخاف ترمينى لمحاتك

أخاف صدك بخاف جورك واحب تتهنى بحياتك

بحبك حبى للعافية وكمان يا سيدى وحياتك

بحب فيك الحيا الفطرى ويذوب من حالى صيحاتك

إذا فى حبكم ضعت واذا أُقبر فى ساحاتك

أكون للحظ دوام شاكر وأقبل أنت راحاتك

أحب أنظر جمال محياك وأخاف تسحرنى بسماتك

وأخاف لحظك يجرحنى واحب تسكرنى بسماتك

وأحب طيفك يأنسنى واحب تسمعنى نغماتك

وأخاف هجرك يطول بى و أخاف تحرمنى كلماتك

منعم يا فريد عصرك سعيد وسعيده ساعاتك

مكمل يا نزيه صافى وعفافك فطرى مافاتك

وديع وبديع مثال رقة حشيم والريم هوى صفاتك

أٍرت فؤادى يا ضامر ودمعى خضاب فى كفاتك

زيد يا دمعى فى سيلك وزيد يا صدرى زفراتك

حبيبك ودعك راحل زيد يا طرفى عبراتك

حمام الأيك حن مره تعال أسمعنى نبراتك

طربت أم در مقر أملى زمان كفاى عباراتك

ضاع صبري
ضاع صبري - عبيد عبد الرحمن

ضاع صبري اين ياوصـلي..
قلبــي بنارالغرام مصـلي
ياعـهود امالي أنفصــــــلي..
مابقيـف من النـويح أصلي
عقلي يوت كل ساعة ينقص لي..
فيك ضاع ياطـيبة الأصلي
أيه ده ليل والبدر واضـح لي..
ام ده دعسـك محيو فاضــح لي
يالعيون عاد روقـي وحـلي..
خفي رمشك ده المجـرح لي
زاد من نار الصدود وجلي..
يامعاني الشـعر والزجــــــــلي
باهي جيدك والخــديد مجلي..
ترى ده الهـلاك في الأعين النجـلي
ليك نسايم الشوق دوام رسلي..
في هواك كم ضايع مثــلي
ماسليتك وأنت كيــف تسلي..
وأنا صرت ميت وميت والدموع غسلي
مالي ياليل الهم تجمع لي ..
ديمـه يا نيراني تشــتعـلي
يابدر بالله أســطعـلي..
وياسـهيل أرجـوك تسمعلي
ترمي محييك في الكـــفل تعلي..
تفني قامتك بالصـدير تعـلي
ياحمام بالله أسـجع لي..
ماله ضـــايع في الخيال فعلي





لي في المسالمة غزال
كلمات/ عبدالرحمن الريح
لي في المسالمة غزال .. نافر بغني عليهو
جاهل وقلبو قاسي وقلبي طائع ليهو
مصباح الظلام الـ ربنا معليهو
زايد في الجمال نور الجمال جاليهو
لو شافو الغزال على نفرتو بواليهو
وان شافو القمر أنوارو تخجل ليهو
ان جاه النسيم زي الفرع يتنيهو
والثمر الرطيب كذب البقول يجنيهو
باللمي والخدود ياذا العشوق بفنيهو
الصحا والنعاس والسحر في عينيهو
كل من شافو قال انا بالنفس افديهو
هو غصن الرياض الزاهي في واديهو
أزهار الربيع مازج زهور خديهو
وجدلات الحرير ما لينه ذي ايديهو
والدو معجنو على فطرتو مربيهو
هو الفرد الوحيد في الدنيا ما في شبيهو
يتجاهل علي وأنا حالي ما غابيهو
سالبني في نار هواه شال قلبي يلعب بيهو

الشاعر الدبلوماسي صلاح احمد ابراهيم 1933-1993م رحمة الله

يامرية
ليت لي ازميل فدياس وروحا عبقريا
وامامي تل مرمر
لنحت الفتنة الهوجاء في نفس مقاييسك
تمثالا مكبر
وجعلت الشعر كالشلال بعض يلزم الكتف
وبعض يتبعثر
وعلى الاهداب ليلا يتعثر
وعلى الاجفان لغزا لا يفسر
وعلى الخدين نورا يتسكر
وعلى الاسنان سكر
وفما (كالاسد الجوعان ) زمجر
يرسل الهمس به لحنا معطر
وينادي شفة عطشى واخرى تتحسر
وعلى الصدر نوافير جحيم تتفجر
وحزاما كلما قلت قصير هو
كان الخصر اصغر
يامرية
ليت لى ازميل فدياس وروحا عبقريا
كنت ابدعتك بيدية
يامرية
ليتني في قمة الاولمب جالس
وحوالي العرائس
وانا في ذروة الالهام بين الملهمات
فاذا ما سرت النشوة فيّ
اتداعي وانادي يابنات
نقروا القيثار في رفق وهاتوا الاغنيات
لمرية
يامرية
ما لعشرينين باتت في سعير تتقلب
ترتدي ثوب عزوف وهي في الخفية ترغب
وبصدرينا بروميثيوس في الصخرة مشدودا يعذب
فبجسم الف نار وبجسم الف عقرب
انت ياهيلين
يامن عبرت تلقاءها بحر عروقي الف مركب
ياعيونا كالينابيع صفاء ونداوة
وشفاها كالعناقيد امتلاء وحلاوة
وخدودا مثل احلامي ضياء وجمالا
وقواما يتحدى كبرياء واختيالا
ودما ضجت به كل الشرايين اشتهاء ياصبية
تصطلي منه صباحا ومساءا غجرية
يامرية
انا من افريقية
صحرائها الكبرى وخط الاستواء
شحنتني بالحرارات الشموس
وشوتني كالقرابين على نار المجوس
لفحتني فانا منها كعود الابنوس
وانا منجم كبريت سريع الاشتعال
يتلظى كلما اشتم على بعد تعال
يا مرية
انا من افريقية جوعان كالطفل الصغير
وانا اهفو الى تفاحة حمراء
من يلمسها يصبح مذنب
فهلمي ودعيها
وانبئيها
انها لم تحترم رغبة نفس بشرية
أي فردوس بغير الحب كالصحراء مجدب
يامرية
وغدا تنفخ في اشرعتي انفاس فرقة
وانا اذداد نأيا
مثل (بوليس)
وفي الاعماق حرقة
ربما لا نلتقي من بعد هذا
يامرية
فتعالي وقعي اسمك بالنار هنا في شفتية
ووداعا يامرية

أغاني الحقيبة لسيد عبدالعزيز
قصيدة: اقيس محاسنك بمن سيد عبد العزيز

اقـيـس مـحاسنك بـمن يـالدرة الـماليك تـمن
والله نــــور عـيـنـي ونـــور الــزمـن
مـاشفنا فـي طـول الزمن سواك بدري داخل كمن
الانــوار يـتزاحمن فـي خـدودك اخـدن امـان
ومـن فـاهك يـتقسمن بـروق في بروق يتبسمن
دي الـدنيا ام جـنة عـدن شـفنا ملاك لابس بدن
انـسان لـكن مـفردا حـاز الـنور حـاز الـلدن
غـصنه مـهفهف ام لدن هيبه اسد في عيون شدن
يـاالجبرة الـمازجة الـعجن جبينك زي فلق الدجن
جـسمك بـالطيب انـعجن اذا الـنسمات بيك عرجن
طـبـاق الـجـو يـتـأرجن والانـفـس يـتهيجن
رنـت نـرجس مـن الـوسن بعيونه الايمن جسن
ران ايـه الـحسن الاسن غصون الروض يتمايسن
فـي ذاك الـذي الـحسن وكـله حسن مالك حسن
عروض زي عارضيك صفن حلال سحرك ماسحر فن
كـواكب الـنور الـبلفحن بـي صـفاتك مااتوصفن
بـدور الـكون لو ينصفن يسجدن ليك مايكون وقفن
فـيك عـيون الرائين يرن محاسنك بالحسن ازدرن
مـهـما افـكاري يـكبرن ذي حـسنك مـايعبرن
مـع الـبدرين سيرك سرن ومن وزنك هن يقصرن

الفي دلاله
شعر : سيد عبد العزيز
---------------------
الفي دلاله ماأعظم جلاله
إستحل هلاكي ولي حرم هِلاله
الهلال الشغل الناس هِلاله
الظلام حين شاف محيه أنجلالهُ
نضرة خدوده وبالأنوار يلالو
راح أنفسنا وريحانة لخِلاله
المنعم توب العز كِِساله
مثال النعمة وماأعظم مِثاله
جداول ديسه في وردانه سالو
طيبه يعبق كل ما الليل أمساله
شالو فاله الناس يتمنوا حاله
مثاله الباسم وحتى الغيم سِحاله
ومن ضميري حب الغير محاه
نائم وخِلى الكان نائم صِحاله
المدلل ما أكرم خصاله
حسنه وافي ومافي لسان حصاله
عالي سماه بي بعيد وصاله
المحاسن في مراية جماله
رطب قوامه وخمر التيه أماله
يتلو قلبك عند قلت شماله
وتدعيله عليه يدوم كماله

الجِنان في الدنيــا
الشاعر/ سيد عبد العزيز
---------------------------
الجِنان في الدنيــا والليالي تدور
أم دي ليلة وجمعت بين شموش وبدور
أم دي زينة الدور أم ليلة القدر
الفيها زي ماندور هاهو نور في خدور
العفاف والرقة والقدارة يدور
بين بنات الحور والسحر في عيونن
منه كم مسحور
والحسود منحـــور
والبروق تلامع من بسوم ونحور
والقديم مبتور
بالهياب مسبور
زي عظمة القائد في حزا الطابور
النظر مكسور دون توغل تارك
كم قلب مكسور
في حسابه كسور
وحاله حال الواقف في الحساب مأسور
الجلال مأمور في النظام المحفل
بالفرح مغمور
والمحل معمور
بالأدب زي حرمة بيته المعمور
الكمال مشهور
في الغصون الرايعة يانعة فايقة زهور
فادعة مايسة ظهور
ساعة بينهن توزن ياصديقي دهور
القمر في نور
والنجوم تتلامع في سما البلور
شئ عجيب يالنور
رب محمد شفنا الدنيا نور في نور

الليلة لا قيته
الشاعر سيد عبدالعزيز
------------------
الليلة لا قيته
القلب حباه
وبالشكر واليته
ما عشقت هندامه وقامته وتواليته
أنا عاشق أخلاقه وقدرته جليته
ياليته يشعر بى ياليته ياليته
بالزمة با مدهش
وجدانى هزيته
منى الفؤاد بالصد صدعته وأذيته
وأن حلفونى بأسمك عن ضررى عزيته
ليه ودى بالهجران يا حبيبى جازيته
أنا لو ضمنت رضاك
كان شخصى هنيته
وبيك تم لى أملى
الفى الكون تمنيته
وأقول صريح للناس يا ناس السعد ظنيته
عرج على بعد ما خلاص العمر أفنيته

الليل ما بنومو
سيد عبدالعزيز
----------------
الليل الليل ما بنومو لأني
أنا حارس نجومو
طول يا ليل وهود
عاجبني طول الليل
الليل نسيمو عليل
الليل سكونو جميل
الليل به النساك تتأمل الأفلاك يا ليل
الليل به العشاق تتذوق الأخلاق
تتناجى بالأرواح
ولشدة ما ترتاح
ما دايرة تاني صباح
الليل الليل ما بنومو لأني
أنا حارس نجومو
أنا راصد كواكبه تائه
في ظلامه سابح
في خيالو سارح
وما عاشق جماله
بس لي فيه ذكرى
وماخد عنه فكرة
يكون فيه التلاقي
وانظر فيه حبي
الحابيهو قلبي ينظر ما يلاقي
الليل الليل ما بنومو لأني
أنا حارس نجومو
ويا ليل يا ليل يا ليل يا ليل
بالله عيرني سماع
اشكيك حبي الضاع
وتغير الأوضاع
هويت محاسن إنسان
في غاية الإبداع يا ليل
عاهدني حبيته
ووجدته عهده خداع
قت ليهو الوداع
يا حبيبي الوداع
الوداع الوداع
يا سميري الوداع
الليل الليل ما بنومو لأني
أنا حارس نجومو
الإكتئاب في أغنية الحقيبة.
الإكتئاب :
مصطلح طبي يشمل نطاقاً واسعاً من الإضطرابات النفسية. في أخف حالاته قد يتسبب الإكتئاب في مزاج هابط لا يمنعك من السير في حياتك الطبيعية، لكنه يصٌعب عليك القيام بالأمور ويجعلها تبدو أقل قيمة. في أعنف حالاته فإن الإكتئاب قد يهدد الحياة، وقد يدفعك إلى التفكير في قتل نفسك أو التوقف عن الرغبة في الحياة.
-------
استوقفني هذا التفسير لمعنى الإكتئاب..و أثار فضولي ما قرأته عن أعراض الإكتئاب...فرأيت أن أقارن بين ما قرأته من أعراض و ما نسمعه من أغاني الحقيبة السودانية..فكان هذا البحث الطريف.
----
آلام جسدية أو Fatigue
مع الآلام هاجت شجوني.....
وأطباء الكون ما عالجوني
غلبني أسير هيا درجونى.......
وعلى الأطلال ليل عرجونى
--
حليف آلام وعيٌونى عيون
دائى عظيم ..ودواى مصيون
----
حزن دائم أو Deep Grief
أنا يا حبيبي غرامي تركتو للايام
تركت حب ودموع.. تركت شوق وهيام
__
يا فريع ياسمين متكي في رمالو
قول لي عاشقك وين ضاعت امالو.
----
أفكار غير عقلانية أو هلاوس أو Hallucinations
لو ما حبيبي يرحم لاشك في دماري
نار الغرام صلتني في الأدمع إنهماري
ما دام صبحت عاشق و الحب صبح ثماري
سيبوني في الأرايك أسجع مع القماري..!!
---
قلق أو Anxiety
طول نهاري ثم ليلى ساهي سهران
طال عذابي وصاح غرابي جوى عكران
دمعي هامي وشوقي نامي وفرشي نيران
---
أفكار سوداوية أو Gloominess
الجور تفشٌى والهجران تبدٌى
والحب ده ولى..والاخلاص تعدى..
تَرِك حمامة.. تخبرني بيهو ياما
تقولي أصبر.. في العجلة الندامة
وكم صبرنا..كم كم إلاما..
تضيع عهودنا وتحرمنا من غرامها..
--
كيف الحياة غير ليمك
في بُعدك اصبح حظي زي لون هضليمك
يا نعيم الدنيا.
---
..بيّ ضاق الكون ، لا أجدلو بَرَاح
منّي فارق ، وشال نوم عيوني ورَاح
عمري أضحى مُبَاح
وفي الغرام لا أقصد غير لقاك أرباح
سِرِّي ليك يُبـاح
مع الظلام تتبسم وليلي يبقى صباح
جيش غرامك زَاح
هَـدَّ حِصـن المُهجة ، ولي دِمَاي نَزَّاح
وعقلي كـاد ينزاح
وقُلّي هجرك جَـدْ يا جافي ولاّ مِـزاح
---
أرق دائم أو Insomnia
ليالي هناى جد عاكسوني.....
وأخاصم النوم كيف.. درٌسونى
---
هجد الانام وأنا وحدي مساهر
والنحول علي جسمي ياحبايب ظاهر
أسبابي الحب الطاهر
أسباب سقامي وبكاء طرفي الساهر
لأذاي بعادك مضي سيفه وشاهر
---
يا أزاي و دواي يا راحي يا ريحاني
إنت نايم و أنا ألم البعاد صحاني.
---
مزاج متقلب أو Swings of Moods
مره أندب حظي ومره أهتف أظاهر
أشكو دهري وأناجي النجم الزاهر.
----
هزال أو Weight Loss
زاد أذاي يا صاحي وإعتراني نحول
طرفي دامع وصاحي وبالسهاد مكحول.
---
جسمي صار منحول والمنام يتقلل
طرفو لي رؤياك دمعو كبر وهلل
جفاني النوم.
---
فقدان تركيز أو Memory Problems
عقلي بات كل ساعة ينقصلي
و فيك ضاع يا طيبة الأصل..!!
--
وعقلي كـاد ينزاح
وقُولّي هجرك جَـدْ يا جافي ولاّ مِـزاح.
---
كثرة البكاء أو Sobbing Mood
عيون الصيد ناعسات عيوني..
عيون النيل حاكن عيوني.
--
كل ما أكتم حبك دمعي بيهو يجاهر
مابفيدني طبيب مهما يكون ماهر
طبي مابين كوثر فاك
وبين جواهرسنك اللماعه والخديد الزاهر
--
حين نسيم الليل بي روايحك أتاني
زاد عليّ الشوق و دمعي سال هتاني
و على عفافك دوم زيدني في هجراني.
--
نارو حارقة الجوف و المدامع تبهل
بعد هذا الحال هل وصالك يسهل
تَحِن يا ظلوم
--
ضاع صبري أين يا وصلي
قلبي بي نار الغرام مصلي
يا عقود آمالي إنفصلي
ما بفيق من النويح أصلي..!
---
عُزلة إجتماعية أو Social Withdrawal
نسيت قلبي وروحي و نسوني...
وفقدت الكانوا يؤانسوني.
---
قلة الإعتداد بالنفس أو Low Self-Esteem
أسباب تشٌوقي.. نظرتك
و أسباب نفورك.. نظرتي!
هواي يعجز فكرتك
و جمالك.. يعجز فكرتي.
--
ليك حق في صدودك وتيهك وتذليلك
ليك حق تهجرني .. ويكتر تعليلك.
--
إن قصدت هلاكــى ..تـجــدنـى مـن فرسانك
وإن عـطــفــــت عــلـــى... ذاك مـن إحسانك.
---
لولاهو ما إشتبهت في يميني أو يساري
لولاهو ما صبرت على ذليٌ و إنكساري..!!
---
فقدان الأمل أو Loss of Hope
كم يواعد ويمطل.. يومي طال ممطول
إيه يفيد القول
وإيه يفيد من شِعري فيه مهما أقول
منه حالمة عقول
الوصول للبدر ياخي ما معقول..!!
----
من بوست ((الحزن في شعر الحقيبة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
طارق عبد الرحمن

avatar

المساهمات : 21
تاريخ التسجيل : 09/01/2008
العمر : 36
الموقع : tarigco220@hotmail.com

مُساهمةموضوع: رد للاخ فتح الرحمن على الدرر الجميله   الجمعة أغسطس 15, 2008 12:20 am

الاخ الفاضل اولا اشكرك على هذه الدرر الجميله
وثانيا بنقول ليك جد وجود امثالك من زمان فاقدنو
فى المنتدى وبنطلب منك ان تاتينا بكل ماعندك
وانا اشيد بمواضيعك الجميل وتحياتى للجميع بالسعوديه
وخاصه السيد وايهاب وعبد المتعال وكل التكانه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عظوم عمر ابابيل

avatar

المساهمات : 43
تاريخ التسجيل : 02/09/2008
العمر : 37

مُساهمةموضوع: الاحسساس المرهف   الأربعاء أكتوبر 22, 2008 5:28 am

الاخ الرومانسى فتح الرحمن والله انه درر وقعت فوق جرح الواحد اقرا واحب بيها

طوالى ولحسن الحظ الواحد بحب فى امدرمان ينى مافى مشكله فى حتت الفهم لمثل

هذه الاشعار الحقايبية الامدرمانية البحته ولك كل الشكر والاعجاب يارايع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابوالرجال



المساهمات : 7
تاريخ التسجيل : 19/07/2011
العمر : 54
الموقع : سوريا -دمشق

مُساهمةموضوع: رد: بهديكم يارواد المنتدى هذه الروائع من أغاني الحقيبة   الخميس أغسطس 04, 2011 5:07 am

اخى فتحو الذى يحب الحقيبة شخص مسكون بالابداع وانت كذلك .عماد دمشق
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
بهديكم يارواد المنتدى هذه الروائع من أغاني الحقيبة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى التكينـــــــــة :: منتدى الأغاني السودانية-
انتقل الى: